Ai Thlahphaihmi Rili
By: Van Chilly
Cu nute he a voikhatnak kan i ton cu rilikam mino retreat ah. Ka kepha nih thetse a hlamhlonak a sau cang i rilikam kan phak lecangka phanah kaa phoih i ke lawng in ka vak. Thinlung tak in tuah ka huammi ah ruahsur lak nithawng loin vah le vawlei lamh a nuamhnak hmun ah ke lawng in kal hi an i tel. Thli cu uai ngai in a hran chel, lungtho takin a hran chel. Keimahte lawng lungleng ngaiin kaa chawk. Kan i ton ning hi zeipipa chim tlak a um lo caah van khi a hram tiang ka cuanh khawhnak le ti khi a dongh tiang ka zoh khawhnak rilikam thetse rawn lakah cu nute cu ka rak ihmuh, tiah a fawinak in ti ko hna usih.
Sullam a ngei bantuk ngei lo bantuk a mitmu tete sinah duhnak a muru cu ka rak kheh. Cu ni cu van nih rili faak deuh in a nenh sual rua, tilet an tho ngai. Ka thinlung zong a mitau nih faak ngai in a rak nenh ve, lung a tur hringhran. A voikhatnak ka hmuh lecangka ka thinlung chung a sining tak langhter dingah ka cafang pawl nih an ka bawm kho lai lo.
Zeitluk aa dawh in ka hmuh ti zong kha ka kut nih a ttial kho hlei lai lo, inn thilri pawl kan herh caan ah a umnak kan theih tawn lo bang khin. San na tlai lo tuk..ka tta, tiin rak ka hnem sehlaw cu tha a dam deuh hnga. I, ka pum umtuning tu tlawmpal langhter khawh kaa zuam lai. Minung kan pum zapi thilri ah a nganbik cu kan cuarvun a si, i cu in thawk ko ning.
Laitlang um balmi nih cun nan theih lai. Khuasik thla chung chunnitlak rianttuan, cu i zaanlei khua muih lai hrawngah ti lum in i kholh khi. Ti lum nih a conmi kan cuar an ka samhpiak bantuk khin cu lio kha ka cuar tlawmpal aa zam men lai ka ti. Minung kan pum chungah hin thiri 650 hrawng a um, an ti. Kan thom tuk lio maalit thiammi nih a fahnak zawn kheng lakin a hmeh khawh caan i a nuamh zia nan theih.
Kan mit aa ton lio ahkhin thihri 600 nak tlawm lo tthate in aa maalit. Cun, kum tling minung kan pum chungah ruh 206 a um an ti. Cu ah, ruh 200 hrawng tel cu an mawlmok hrim. Cu ka cuar, ka thihri le ka ruh pawl an pathum fonh sining kha hmakhat ah ka ton cu a si ti tiang lawng ka chim khawh zat cu si seh. Mino retreat a si bang khat le khat i theih nakhnga chawnhbiak caan a um. Bia cu a chim si ah a ruah si ah ka thiam lo ngai, kei hi.
Min kan i chim hnu cun chim ding bia a pit, a dih. A min cu ciah loin a dolh in ka dolh rua, ka zah colh. Ka min an ka hal hmanhah a min chim hna kaa timh caan a tlawm ti lo. Anih cu ka min cu chim lo ka sam a tawi ma a sau ti hmanh a hliah ti lai lo, tiah ka huam lo ngai nain ka zumh.
Kir lei... Hawi dang bang nungak pawng tthut kaa cuh lo nain a pawng ah ka tthu sual. A baa ngai rua. Kan i thawh tlawmpal ah a ngu colh. Lungthli ka tum bang suimilam cheu hrawng kan i cit hnu ka ttang cungah a hngawng a rak tlu. Aa hlau i a tthial colh. Nain, a tlai tuk cang. Biazai dengdeng catlang tlawmpal ka ttang ah an ttil manh.
Ka tlaih manhmi biatlang pawl cu hitin... Nute... Kan hmuh cangka Ka palhnak vialte Kaa ngaithiam Mi thiang ka si cang. Na biang cu Ka ttang cungah Hmun camcin ko seh. (Amen, ti chap lo ding.) Rilipi le a tilet pawl cu ka thinlung nih aa ttinpi ve. Rili chung sau tuk kaa paih caah si rua, ka lu a ri. Ka mitsiar in sau tuk ka zoh ruangah si rua, ka lung(thin) a mit. Cuticun...dam in inn ka phan kho. Ka thinlung te lawng rai nih a fenh.
A zaan ah pumlulh ceu thlapa nih, “ Zaan thlapate aw...” timi Hniang Hniang hla kha a ka sakpiak. Ka lunghno lo nain ka hnarkua in a hang dor tete an rak tolh. Ruahpak loin, ka lung ah Nanda Thein Zan nih a rak ttialmi ka theih tthan. Minung pakhat nih duhnak a ton tikah thluak chungah isodoxine timi daat phunkhat a chuak.
Cu daat cu a thla in kum hnih, kum thum tiang a nguh tawn. A rianyuanmi a dih cun duhnak zong a lo ve tiin chemistry lei thiamsang pawl nih an hmuh, tiah a ttial. Duh daat ti ko usih, cu pawl cu ka thinlung ah aa tlum ti rua lo ruangah maw lengah hitin an rak pawt hnga tiah ka ruat. A si sual ah tiin tlawmte ka liah chun. Zeibia, hnap!!! Nilin lak sau ka vah ruang ka cumpit ruang tu a si lai. Khatlei ah, duh daat hei si tak ko sehlaw...umhar pheng ah rak ka tuak piak hmanh uh. Voikhat a ka mirh ah kum 2 ca duhnak a thar rak pawt lengmang dawh in.
(Tuanbia chung i Duh Mang ka si lo caah kum 3 taitai tiang a nguh lai tiin kaa chim ngam hrim lo.) Mirh 1 = kum 2 Ni 1 = Mirh 10 (a tlawmbik) Zarh khat = Mirh 70 Mirh 70 = kum ? Cuticun, hi lenthloi te cu mirh bu in ka rak yial. ###
By: Van Chilly
Cu nute he a voikhatnak kan i ton cu rilikam mino retreat ah. Ka kepha nih thetse a hlamhlonak a sau cang i rilikam kan phak lecangka phanah kaa phoih i ke lawng in ka vak. Thinlung tak in tuah ka huammi ah ruahsur lak nithawng loin vah le vawlei lamh a nuamhnak hmun ah ke lawng in kal hi an i tel. Thli cu uai ngai in a hran chel, lungtho takin a hran chel. Keimahte lawng lungleng ngaiin kaa chawk. Kan i ton ning hi zeipipa chim tlak a um lo caah van khi a hram tiang ka cuanh khawhnak le ti khi a dongh tiang ka zoh khawhnak rilikam thetse rawn lakah cu nute cu ka rak ihmuh, tiah a fawinak in ti ko hna usih.
Sullam a ngei bantuk ngei lo bantuk a mitmu tete sinah duhnak a muru cu ka rak kheh. Cu ni cu van nih rili faak deuh in a nenh sual rua, tilet an tho ngai. Ka thinlung zong a mitau nih faak ngai in a rak nenh ve, lung a tur hringhran. A voikhatnak ka hmuh lecangka ka thinlung chung a sining tak langhter dingah ka cafang pawl nih an ka bawm kho lai lo.
Zeitluk aa dawh in ka hmuh ti zong kha ka kut nih a ttial kho hlei lai lo, inn thilri pawl kan herh caan ah a umnak kan theih tawn lo bang khin. San na tlai lo tuk..ka tta, tiin rak ka hnem sehlaw cu tha a dam deuh hnga. I, ka pum umtuning tu tlawmpal langhter khawh kaa zuam lai. Minung kan pum zapi thilri ah a nganbik cu kan cuarvun a si, i cu in thawk ko ning.
Laitlang um balmi nih cun nan theih lai. Khuasik thla chung chunnitlak rianttuan, cu i zaanlei khua muih lai hrawngah ti lum in i kholh khi. Ti lum nih a conmi kan cuar an ka samhpiak bantuk khin cu lio kha ka cuar tlawmpal aa zam men lai ka ti. Minung kan pum chungah hin thiri 650 hrawng a um, an ti. Kan thom tuk lio maalit thiammi nih a fahnak zawn kheng lakin a hmeh khawh caan i a nuamh zia nan theih.
Kan mit aa ton lio ahkhin thihri 600 nak tlawm lo tthate in aa maalit. Cun, kum tling minung kan pum chungah ruh 206 a um an ti. Cu ah, ruh 200 hrawng tel cu an mawlmok hrim. Cu ka cuar, ka thihri le ka ruh pawl an pathum fonh sining kha hmakhat ah ka ton cu a si ti tiang lawng ka chim khawh zat cu si seh. Mino retreat a si bang khat le khat i theih nakhnga chawnhbiak caan a um. Bia cu a chim si ah a ruah si ah ka thiam lo ngai, kei hi.
Min kan i chim hnu cun chim ding bia a pit, a dih. A min cu ciah loin a dolh in ka dolh rua, ka zah colh. Ka min an ka hal hmanhah a min chim hna kaa timh caan a tlawm ti lo. Anih cu ka min cu chim lo ka sam a tawi ma a sau ti hmanh a hliah ti lai lo, tiah ka huam lo ngai nain ka zumh.
Kir lei... Hawi dang bang nungak pawng tthut kaa cuh lo nain a pawng ah ka tthu sual. A baa ngai rua. Kan i thawh tlawmpal ah a ngu colh. Lungthli ka tum bang suimilam cheu hrawng kan i cit hnu ka ttang cungah a hngawng a rak tlu. Aa hlau i a tthial colh. Nain, a tlai tuk cang. Biazai dengdeng catlang tlawmpal ka ttang ah an ttil manh.
Ka tlaih manhmi biatlang pawl cu hitin... Nute... Kan hmuh cangka Ka palhnak vialte Kaa ngaithiam Mi thiang ka si cang. Na biang cu Ka ttang cungah Hmun camcin ko seh. (Amen, ti chap lo ding.) Rilipi le a tilet pawl cu ka thinlung nih aa ttinpi ve. Rili chung sau tuk kaa paih caah si rua, ka lu a ri. Ka mitsiar in sau tuk ka zoh ruangah si rua, ka lung(thin) a mit. Cuticun...dam in inn ka phan kho. Ka thinlung te lawng rai nih a fenh.
A zaan ah pumlulh ceu thlapa nih, “ Zaan thlapate aw...” timi Hniang Hniang hla kha a ka sakpiak. Ka lunghno lo nain ka hnarkua in a hang dor tete an rak tolh. Ruahpak loin, ka lung ah Nanda Thein Zan nih a rak ttialmi ka theih tthan. Minung pakhat nih duhnak a ton tikah thluak chungah isodoxine timi daat phunkhat a chuak.
Cu daat cu a thla in kum hnih, kum thum tiang a nguh tawn. A rianyuanmi a dih cun duhnak zong a lo ve tiin chemistry lei thiamsang pawl nih an hmuh, tiah a ttial. Duh daat ti ko usih, cu pawl cu ka thinlung ah aa tlum ti rua lo ruangah maw lengah hitin an rak pawt hnga tiah ka ruat. A si sual ah tiin tlawmte ka liah chun. Zeibia, hnap!!! Nilin lak sau ka vah ruang ka cumpit ruang tu a si lai. Khatlei ah, duh daat hei si tak ko sehlaw...umhar pheng ah rak ka tuak piak hmanh uh. Voikhat a ka mirh ah kum 2 ca duhnak a thar rak pawt lengmang dawh in.
(Tuanbia chung i Duh Mang ka si lo caah kum 3 taitai tiang a nguh lai tiin kaa chim ngam hrim lo.) Mirh 1 = kum 2 Ni 1 = Mirh 10 (a tlawmbik) Zarh khat = Mirh 70 Mirh 70 = kum ? Cuticun, hi lenthloi te cu mirh bu in ka rak yial. ###